Tramp Nýu-Ýorkda geçirilýän BMG-niň Baş Assambleýasynyň 81-nji mejlisine gatnaşyp, çykyş etdi.
Çykyşynyň başynda birnäçe wagtlap ABŞ-nyň içerki syýasaty we ykdysadyýeti baradaky pikirlerini beýan eden Tramp, araky saýlawlaryň öňüsyrasynda öz saýlawçylaryna ýüzlendi.
ABŞ-nyň Prezidenti hökmünde işe girişen gününden bäri sekiz urşy bes etdirendigini öňe süren Tramp, Russiýa–Ukraina urşunyň, Eýran bilen dowam edýän urşuň, Gazadaky ynsanperwerlik krizisiniň we beýleki sebitlerdäki çaknyşyklaryň çözülmegi ugrunda uly tagallalaryň edilýändigini aýtdy.
Trampa görä, Eýran bilen ylalaşyk 3-nji noýabrdaky saýlawlardan soň gazanylar
Eýran meselesinde öňki garaýyşlaryny esasan gaýtalan Tramp: “(3-nji noýabrdaky) saýlawlaryň yzy ýanyndan (Eýran bilen) ylalaşyk gazanyljakdygyna ynanýaryn, sebäbi olaryň muny etmezliginiň manysy ýok.” diýip belledi.
Eýranyň saýlawlaryň nähili netijesine garaşýandygyny öňe süren Tramp, saýlawlara özüniň gatnaşmaýandygyny, diňe Respublikan partiýanyň bäsleşýändigini aýtdy.
ABŞ-nyň Prezidenti Eýran bilen ylalaşyk gazanmak ýa-da Eýrany “ýok etmek” meselesinde karar tapgyryna gelendigini nygtady.
Eýran bilen başdan geçirilýän krizisin çözülmelidigini aýdan Tramp, meseläniň “çalt” çözülmelidigine ünsi çekdi.
“Gaza milliardlarça dollarlyk kömek berler”
Türkiýäniň Gaza üçin edýän tagallasyna ünsi çeken Tramp, ýygnanan serişdeleriň wagty gelende Gazany täzeden dikeltmek üçin ulanyljakdygyny we ýurtlaryň örän sahawatly bolandygyny aýtdy.
Tramp:“Gaza boýunça Parahatçylyk Geňeşine agza ýurtlaryň kömek işlerine goşan milliardlarça dollarlyk goşantlary üçin minnetdardyrys. Bu serişdeler gönüden-göni Gazany täzeden dikeltmek we ynsanperwer kömek işlerine gönükdirilýär. Marokko, Bahreýn, Katar, Kuweýt, Pakistan, Saud Arabystany, Türkiýe we başga-da ençeme ýurt öz goşandyny goşdy. Bu ýurtlar diýseň sahawatly boldular.”
Wezipesine girişeli bäri sekiz urşuň bes edilmegini özüne buýsanç getirýän üstünlik hökmünde häsiýetlendiren Tramp, gelip gowuşýan serişdeleriň zerur ýerlerde ulanylýandygyny, adamlaryň ynsanperwer kömegiň dogry görnüşde amala aşyrylmagyny isleýändigini we milliardlarça dollarlyk kömegiň Gaza akdyryljakdygyny aýtdy.
“Russiýa–Ukraina meselesini çözeris”
ABŞ-nyň Prezidenti Tramp Russiýa–Ukraina urşunyň bes edilmegi üçin hem uly tagalla edilýändigini we urşuň bes edilmegini isleýändiklerini nygtan ABŞ-nyň Prezidenti Tramp: “Russiýanyň we Ukrainanyň liderleri bilen örän ýakyn hyzmatdaşlyk edýäris we bu meseläni çözeris.” diýdi.
“Kubadaky hökümet çöker”
ABŞ-nyň Latyn Amerikasy meselesinde hem uly tagalla edýändigini aýdan Tramp, Kubadaky hökümetiň örän şowsuz bolandygyny öňe sürdi.
Tramp: “Kommunistik režimiň uly basyş astynda bolan Kubadaky ýagdaýy düýpgöter üýtgetmegi maksat edinýäris. Kuba şowsuzlyga uçran döwlet. Kuba çökýär we çöker.” diýdi.
ABŞ-nyň Prezidentiniň bu sözleri aýdýan pursatynda mejlisde oturan Kubanyň wekiliýetiniň ýerlerinden turup, Trampa garşy nägilelik bildirmek üçin zaldan çykandygy görüldi.
ABŞ Grenlandiýada 2 harby baza gurar
Tramp Daniýa we Grenlandiýa bilen gazanylan ylalaşygyň çäklerinde Grenlandiýada ABŞ-nyň harby güýçleriniň ýerleşdiriljekdigini we munuň ABŞ-nyň howpsuzlygy üçin möhümdigini aýtdy.
ABŞ-nyň Prezidenti Tramp: “Grenlandiýada amatly ýerlerde giň gerimli harby güýçleriň ýerleşdirilmegine derrew başlarys. Ol ýerde iki sany örän uly harby baza gurarys.” diýip habar berdi.
