Ukrainanyň Prezidenti Wladimir Zelenskiý Russiýanyň harby güýçleriniň paýtagt Kiýewe guran howa hüjümleriniň çagalar baglaryna, mekdep binalaryna we dürli raýat infrastruktura elementlerine gönükdirilendigini habar berdi.

Wladimir Zelenskiý sosial media hasabynda beren beýanatynda Russiýanyň Ukrainanyň paýtagty Kiýewe günüň dowamynda guran hüjümleri barada beýannama berdi.

Zelenskiý şäheriň dürli künjeklerinde hüjümleriň amala aşyrylandygyny habar berip: "Şu gün diňe Kiýewde Russiýanyň uçarmansyz howa ulaglary iki çagalar bagyna we iki mekdebe, adaty ýaşaýyş jaýyna, ýangyç guýujy stansiýasyna, köp sanly ammarlara we aragatnaşyk desgalaryna hüjümler gurady" diýdi.

Şeýle hüjümleriň ukrain jemgyýetine garşy gönükdirilendigini bellän Wladimir Zelenskiý: "Nyşanyň şeýle saýlanmagy dünýäniň islendik ýerinde terrorçylyk diýlip atlandyrylýar" diýdi.

Zelenskiý hüjümleriň netijesinde onlarça adamyň ýaralanandygyny we käbirleriniň ölendigini aýtdy we rus goşunynyň öňňinki günden bäri dowam edýän hüjümlerinde 277 sany uçarmansyz howa ulagyny ulanandygyny belläp: “Zyýan çeken desgalaryň arasynda Saud Arabystanynyň ilçisiniň ýaşaýyş jaýy hökmünde ulanylýan bina hem bar” diýip mälim etdi.

Zelenskiý hüjümler sebäpli Dnepropetrowsk sebitindäki sport mekdebiniň zyýan çekendigini, şeýle hem Sumy sebitindäki çagalar üçin ulanylýan binanyň hem nyşana alnandygyny belledi.