Moskwanyň şäher häkimi Sergeý Sobýanin sosial media hasabyndan beren beýanatynda, Russiýanyň howa goranyş ulgamlarynyň gije Moskwa tarap uçýan ukrain uçarmansyz howa ulaglaryny täsirsiz ýagdaýa getirendigini habar berdi.
Sobýanin hüjümlerde Moskwanyň nebiti gaýtadan işleýän zawodyna zeper ýetendigini, ýöne hiç hili adam pidasynyňbolmandygyny mälim etdi.
Şäher häkimi Sobýanin hüjüm wagtynda Orehowoý bulwary sebitindäki binanyň birine uçarmansyz howa ulagynyň gaçandygy baradaky maglumaty hem paýlaşdy.
Sobýanin Ukrainanyň Moskwa garşy iň uly dron hüjümini amala aşyrandygyny belläp: "Düýnden bäri Moskwa golaýlaşýan 450 uçarmansyz howa ulagy bilen birlikde ähli sebitlerde 1600-den gowrak uçarmansyz howa ulagy täsirsiz ýagdaýa getirildi. Bu deňsiz-taýsyz hüjüm saýlawlaryň öňüni almak üçin meýilleşdirilipdi. Duşman bu synanyşykda şowsuz boldy" diýdi.
Moskwa welaýatynyň häkimi Andreý Worobýew hem sosial media hasabyndan beren beýanatynda Moskwa sebitiniň gije uly möçberli uçarmansyz howa ulagy hüjümlerine sezewar bolandygyny aýtdy.
Worobýew howa goranyş ulgamlarynyň ýerli wagt bilen sagat 03:00 bilen 05:00 aralygynda 17 welaýatyň etrabynda jemi 249 UHU-ny urup düşürendigini ýa-da täsirsiz ýagdaýa getirendigini aýtdy we Ramenskoýe etrabynda 21 gatly jaýyň üçeginde uçarmansyz howa ulagynyň ýangyna sebäp bolandygyny we netijede 70s- çaga jemi 400 adamyň ewakuasiýa edilendigini aýan etdi.
Beýleki tarapdan Russiýanyň Federal Howa Ulaglary Agentligi (Rosawiasiýa) Moskwanyň Wnukowo we Şeremetýewo howa menzillerinde uçarlaryň gonmagyna we uçmagyna wagtlaýyn çäklendirmeleriň girizilendigini mälim etdi.
