Ukraina Russýa ýüzlerçe uçarmansyz howa ulagy bilen hüjümler amala aşyrdy; rus resmileriniň maglumatyna görä, hüjümlerde 1-i çaga bolan azyndan 5 adam ýogaldy.

Resmileriň aýtmagyna görä, duşenbe güni agşam bolan hüjümlerde käbir binalar, şol sanda köp sanda jaý we ammarlar ýandy.

Ukrainanyň Prezidenti Wladimir Zelenskiý Facebook hasabyndan beren beýanatynda, Ukrainanyň harby güýçleriniň front liniýasyndan uzakda ýerleşýän Rostowdaky eksport terminalyna we Ýaroslawldaky we Udmurtiýadaky nebit desgalaryna hüjüm gurandygyny belläp: "Düýn gije uzak aralykly hüjümlerimiz Rostow sebitinde netijeli boldy. Front liniýasyndan takmynan 250 kilometr uzaklykda ýerleşýän eksport terminalyna hüjüm guraldy. Uzak aralykly hüjümler Ýaroslawl sebitindäki we Ukrainanyň döwlet serhedinden 1300 kilometr uzaklykda ýerleşýän Udmurtiýa Respublikasyndaky nebit desgalaryna gönükdirildi" diýip habar berdi.

Ukraina bilen serhetdeş Belgorod sebitinde ýerli resmiler ukrain uçarmansyz howa ulaglarynyň iki çaga bilen birlikde 12 adamy ýaralandygyny we köp otagly jaýda ýangyn döredendigini habar berdiler.

Russiýanyň Goranmak ministrligi howa goranyş ulgamynyň bir gijede 276 sany uçarmansyz howa ulagyny ýok edendigini aýan etdi.