Russiýanyň Howpsuzlyk Geňeşiniň sekretary Sergeý Şoýgu Ukrainanyň we Ýewropa ýurtlarynyň urşy dowam etdirmäge taýýarlanýandygyny aýdyp, "Kiýew uzak möhletli parahatçylygy gazanmaga mümkinçilik berýän çözgütleri ara alyp maslahatlaşmaga taýýar däl" diýip belledi.
Garaşsyz döwletler arkalaşygyna (GDA) agza ýurtlaryň Howpsuzlyk Geňeşiniň sekretarlary Russiýanyň paýtagty Moskwada duşuşdy.
Maslahatda çykyş eden Şoýgu Günbataryň dünýäde dartgynlylygy artdyrýandygyny, munuň bolsa global çaknyşyklaryň artmagyna sebäp bolýandygyny belledi.
Şoýgu Ukraina krizisine salgylanyp, ABŞ-nyň Prezidenti Donald Trampyň we onuň toparynyň krizisi çözmek üçin edýän tagallalaryna minnetdarlyk bildirýändiklerini aýtdy.
Şoýgu Ýewropa ýurtlarynyň Kiýewe harby we maliýe goldawyny dowam etdirýändigini belläp: "Ukraina we onuň ýewropaly goldawçylary parahatçylyga däl-de, urşy dowam etdirmäge taýýarlyk görýär. Sosial we ykdysady meseleleriň artmagyna garamazdan, Kiýew uzak möhletli parahatçylygy gazanmaga mümkinçilik berjek çözgütleri ara alyp maslahatlaşmaga taýýar däl" diýdi.
Şoýgu Ýewropada harbylaşdyrmak prosesiniň dowam edýändigini we NATO-nyň Polşada we Baltika ýurtlarynda harby infrastrukturasyny güýçlendirmek üçin çäreleri görýändigini aýtdy.
