ABŞ-nyň prezidenti Donald Tramp häzirki wagtda Eýrana garşy täze harby operasiýanyň zerurlygynyň ýokdugyna ynanýandygyny aýtdy.
Donald Tramp Ak Tamyň brifing otagynda geçirilen metbugat ýygnagynda gün tertibiniň ileri tutulýan ugurlary baradaky soraglara jogap berdi.
ABŞ-nyň Prezidenti: "Eýrana garşy harby operasiýa häzirki wagtda zerur däl ýaly görünýär, ýöne biz ähli ýagdaýlara taýýar" diýdi.
Tramp Eýran bilen 28-nji fewralda başlan urşuň tamamlanmagyna golaýlaşýandygyny aýdyp: "Biz bu çaknyşygyň soňuna tarap barýandygynyň depginini görýäris. Meniň pikirimçe, ol tiz wagtda tamamlanar" diýdi.
ABŞ-nyň Prezidenti Ysraýylyň we Ýakyn Gündogaryň "Eýran howpundan" goralýandygyny we Eýranyň ýadro ýaragyna eýe bolup bilmejekdigini aýtdy, ýöne Eýran bilen gepleşikleriň gowy gidýändigini we bu tapgyryň tiz wagtda tamamlanmagyna umyt edýändigini beyan etdi.
"Men hiç zada kepil geçip bilmeýärin."
Beýleki tarapdan, bir soraga jogap hökmünde Tramp ABŞ-nyň diňe häzirki status-kwony saklaýandygyny, ýöne Eýran ters ugurda ädim ätse, zerur çäreleri görjekdigini aýtdy.
Tramp: "Men hiç zada kepil geçip bilmeýärin, ýöne gaýdyp gelmeli bolsak, biz islendik zada taýýar. Eger gerek bolsa, muňa örän çynlakaý çemeleşeris. Biz doly taýýar. Biziň başga bir uçar gämimiz bar. Ol täze we ajaýyp enjamlar bilen doldurylan. Olary ulanmaly bolmarys diýip umyt edýärin" diýdi.
Tramp ABŞ-nyň Eýran bilen ylalaşyga gelmäge umyt baglaýandygyny aýtdy we bu mesele boýunça Tähran bilen gepleşikleriň oňyn dowam edýändigini gaýtalady.
