ABŞ-nyň Merkezi serkerdeligi (CENTCOM) düýn gije Eýrana garşy alty günlük yzygiderli hüjümleriniň soňky tapgyryny tamamlandygyny habar berdi.
CENTCOM tarapyndan berlen ýazmaça beýanatda: "CENTCOM Eýrana garşy iň soňky uly hüjümleriniň tolkunyny ABŞ-nyň Gündogar wagty bilen agşam sagat 21:40-da (Türkiyäniň wagty bilen irden sagat 04:40) tamamlady" diýip habar berildi.
Beýanatda ABŞ-nyň Eýranyň harby nyşanalaryna, şol sanda kenarýaka gözegçilik we howa goranyş pozisiýalaryna, harby logistika infrastrukturasyna we deňiz mümkinçiliklerine harby uçarlary, uçarmansyz howa ulaglary we harby gämileri ulanyp hüjüm gurandygy bellenilip, munuň ABŞ-nyň Eýrana garşy hüjümleriniň altynjy gijesi bolandygy mälim edildi.
Beýanatda häzirki wagtda Ýakyn Gündogarda 50 müňden gowrak ABŞ esgeriniň ýerleşdirilendigi bellenilýär.
CENTCOM düýn Türkiyäniň wagty bilen agşam sagat 21:00-da Eýrana garşy täze howa hüjümleriniň başlandygyny aýan etdi.
Eýranyň metbugaty ABŞ-nyň harby güýçleriniň Eýrana garşy täze hüjümleriň başlandygyny yglan edeninden soň, nyşanalaryň arasynda Iranşahr howa menzili we Hamidiýe şäheri, şeýle hem Bender Abbasdaky köpriniň bardygyny habar berdi.
