Içeri işler ministrligi DKTR-nyň suw giňişliginde batmaga başlan ýolagçy gämisi bilen baglanşykly gözleg we halas ediş işleriniň dowam edýändigini habar berdi.

Türkiýäniň Içeri işler ministrligi Demirgazyk Kipr Türk Respublikasynyň (DKTR) Kiriniýa şäheriniň golaýynda batmak howpyny başyndan geçiren ýolagçy gämisi üçin başladylan operasiýa barada metbugat beýanatyny berdi.

Ministrligiň beýanatyna görä, 2026-njy ýylyň 30-njy awgustynda Kiriniýa portundan ýola çykyp, Mersin Taşuju portuna barýan we düzüminde 259 ýolagçy we 8 ekipaž agzasy bolan "FILOJET" ýolagçy gämisiniň suwa batmaga başlandygy we portdan 4 mil uzaklykda batmak howpuny başyndan geçirýändigi habar berildi.

Beýanatda berlen habardan soň başladylan işleriň çäginde sebite Türkiýeden we Demirgazyk Kipr Türk Respublikasyndan köp sanly toparyň iberilendigi bellenip: “Gözleg we halas ediş işleriniň çäginde, Demirgazyk Kipr Türk Respublikasynyň Kenarýaka howpsuzlyk gullugynyň serkerdeligine degişli 4 sany gämi we “AKGÜNLER 3” atly ýolagçy gämisi sebite iberildi, Türkiýäniň Kenarýaka howpsuzlyk gullugynyň serkerdeligi bolsa sebite 5 sany gämi we 2 sany Kenarýaka howpsuzlyk gullugynyň dikuçaryny iberdi. Mundan başga-da, sebitde dowam edýän operasiýalara goldaw bermek üçin Harby-deňiz güýçleri serkerdeligi tarapyndan 6 sany gämi gönükdirildi. Gözleg we halas ediş işleri degişli gulluklaryň arasynda utgaşdyrylyp, giň gerimli alnyp barylýar” diýip habar berildi.