Amerikanyň Birleşen Ştatlarynyň prezidenti Donald Tramp Waşingtonyň Ukraina bilen Russiýanyň arasyndaky söweş gutarandan soň iki ýurt bilen söwda gatnaşyklaryny ýola goýmaga taýýardygyny aýtdy.

Tramp iki ýurduň gepleşikler arkaly parahatçylyk ylalaşygyna geljekdigine umyt edýändigini aýtdy we çaknyşyklar gutarandan soň ykdysady gatnaşyklaryň dikeldilip biljekdigini beýan etdi.

Russiýanyň Alýaskanyň tebigy gaz pudagyna maýa goýmaga gyzyklanmasy baradaky soraglara jogap beren Tramp ady agzalan maýa goýum teklibine ýörite teswiriniň bolmandygyny, emma uruş gutarandan soň giň ykdysady gatnaşyklaryň täzeden dikeldilip bilinjekdigini aýtdy.

Tramp: "Bu uruş gutarandan soň, biz hökman Ukraina we Russiýa bilen söwda ederis" diýdi.

Tramp çaknyşyklaryň mümkin boldugyça tiz wagtda gutarmagyny isleýändigini nygtap: "Russiýa bilen Ukrainanyň ylalaşyga geljek we iki ýurt bilen hem söwda edip biljek adaty durmuşa gaýdyp gelmek isleýärin" diýdi.