Türkiýäniň Içeri işler ministrligine degişli Adatdan daşary ýagdaýlary dolandyryş müdirligi (AFAD) tarapyndan utgaşdyrylýan halkara ynsanperwerlik kömek işleriniň çäklerinde häzirki wagta çenli bäş yklymdaky 85 ýurda we jemgyýete ynsanperwer kömegini ýetirdi.
AFAD betbagtçylyk diplomatiýasynyň çäginde diňe bir Türkiýäniň içinde däl, eýsem dünýäniň dürli künjeklerinde hem gözleg-halas ediş işlerini we ynsanperwer kömek işlerini dowam etdirýär.
AFAD-yň utgaşdyrmagynda Türkiýe bäş yklymdaky ýurtlara we jemgyýetlere azyk, wagtlaýyn ýaşaýyş üçin serişdeler, lukmançylyk enjamlary hem-de durmuş üçin zerur bolan esasy harytlardan başga-da, maliýe kömegini, logistika goldawyny we gözleg-halas ediş enjamlaryny iberdi.
“Anadoly” habarlar gullugynyň (AA) taýýarlan maglumatlaryna görä, Türkiýäniň iň esasy halkara ynsanperwer operasiýalarynyň biri Gazza üçin amala aşyryldy.
AFAD-yň utgaşdyrmagynda Ysraýylyň hüjümlerinden zyýan çeken sebite 14 uçar we 21 gämi arkaly jemi 109 müň 332 tonna ynsanperwerlik kömegi ýetirildi.
Bu kömegiň çäginde jemi 7,5 million ABŞ dollary möçberinde maliýe goldawy berildi. Şol serişdeleriň 7 million dollary AFAD, 500 müň dollary bolsa Türk Gyzyl Aýy tarapyndan üpjün edildi.
Owganystan üçin alnyp barylan ynsanperwerlik kömek işleriniň çäginde 25 sany “Ýagşylyk otlusy” arkaly 11 müň 739 tonna kömek ýükleri ugradyldy. Mundan başga-da, bu ýurt üçin alty ýük uçuşy amala aşyryldy.
Sudana alty gämi bilen 10 müň 206 tonna ynsanperwerlik kömegi hem-de 30 müň çadyr iberildi.
Şeýle hem Türkiýe Päkistana 9 müň 79 tonna, Somala 3 müň tonna we Liwana 730 tonna ynsanperwerlik kömegini ýetirdi.
Bangladeşe 64 müň 992 ynsanperwerlik kömek bukjasy ugradyldy. Bosniýa we Gersegowina bolsa 60 konteýner öý, ýangyç, arassaçylyk serişdeleri, generatorlar hem-de durmuş üçin zerur bolan esasy harytlar bilen üpjün edildi.
Şu güne çenli Siriýa ynsanperwerlik kömegi ýüklenen 13 müň 938 ýük ulagy ugradyldy.
Zambiýa 25 müň ABŞ dollary möçberindäki kömek serişdeleri hem-de 600 azyk bukjasy iberildi. Kongo Demokratik Respublikasyna 54 müň 70 ABŞ dollary, Burundi bolsa 60 müň ABŞ dollary möçberinde ynsanperwerlik kömegi berildi.
Türkiýäniň soňky halkara ynsanperwerlik operasiýalarynyň biri Wenesuela üçin amala aşyryldy.
Iýun aýynda bolup geçen 7,2 we 7,5 ululykdaky iki ýer titremesinden soň, Türkiýe Respublikasynyň Prezidenti Rejep Taýyp Erdoganyň tabşyrygy boýunça AFAD-yň utgaşdyrmagynda sebite iki harby ýük uçary bilen ynsanperwer kömegi ugradyldy.
Ugradylan kömegiň düzüminde AFAD tarapyndan üpjün edilen 275 çadyr hem-de Saglygy goraýyş ministrligi tarapyndan taýýarlanan 7 tonna lukmançylyk serişdeleri bar.
Wenesuela jemi 30 tonna ynsanperwer kömegini aldy.
Ispaniýada bolup geçen güýçli sil heläkçiliginden soň hem Türkiýe göwrümi 1 müň 100 litr bolan 250 sany plastik zir-zibil konteýnerini we iki ýol arassalaýjy ulagyny iberdi.
