Energetika we tebigy serişdeler ministri Alparslan Baýraktar Hytaý bilen takmynan 15 milliard dollarlyk maýa goýumy göz öňünde tutýan hyzmatdaşlygyň çäginde jemi 7000 megawatt gün we ýel elektrik stansiýalaryny, täze energiýa saklaýyş ulgamlaryny we 4000 megawatt elektrik geçiriji infrastrukturasyny ornaşdyrmagy maksat edinýändiklerini aýtdy.

Baýraktar, Birleşen Milletler Guramasynyň Howanyň üýtgemegi baradaky çarçuwaly konwensiýasynyň 31-nji Taraplar konferensiýasynyň (COP31) çäginde Hytaý Halk Respublikasynyň Milli Energetika edarasy bilen gol çekilen özara düşünişmek memorandumy barada X sosial media platformasyndan beyanat berdi.

Ministr Baýraktar beýanatynda: “COP31-de Hytaý Halk Respublikasynyň Milli Energetika edarasy bilen 'Gaýtadan dikeldilýän energiýa ulgamynda hyzmatdaşlyk etmek barada özara düşünişmek memorandumyna' gol çekildi. Ýurdumyza takmynan 15 milliard dollar möçberinde uly maýa goýumlaryny göz öňünde tutýan bu ylalaşyk bilen jemi 7000 megawatt gün we ýel elektrik stansiýalaryny, täze energiýa saklaýyş ulgamlaryny we 4000 megawatt elektrik geçiriji infrastrukturasyny gurmagy maksat edinýäris” diýip belledi.

Baýraktar bu hyzmatdaşlygyň gaýtadan dikeldilýän energiýa kuwwatynyň artmagyna, şeýle hem tehnologiýa geçişine goşant goşjakdygyny belläp: "Bu hyzmatdaşlyk diňe bir gaýtadan dikeldilýän energiýa kuwwatymyzy artdyrmak bilen çäklenmän, eýsem tehnologiýalaryň geçirilmegini ýeňilleşdirmek arkaly ýurdumyzda ýel turbinasy enjamlarynyň önümçiligine we ýerli senagatymyzyň ösüşine uly goşant goşar. Milli Energiýa 2040-njy ýyl üçin garaýşymyza laýyklykda, energiýa üpjünçiligimiziň howpsuzlygyny güýçlendirjek we ýaşyl özgerişimizi tizleşdirjek bu taryhy ylalaşygyň ýurtlarymyz üçin peýdaly boljakdygyna umyt edýärin" diýdi.