Eýranyň Ynkylap Goragçylary penşenbe güni ýaýradan beýanatynda ABŞ-nyň Eýrana garşy amala aşyran hüjümlerine jogap hökmünde Iordaniýada ýerleşýän we amerikan F-35, F-15 hem-de F-16 kysymly harby uçarlarynyň ýerleşýän harby bazasyna hüjüm guralandygyny mälim etdi.
Beýanatda Ynkylap Goragçylarynyň Aero-kosmos güýçleriniň Al-Azrak howa bazasyna we ABŞ-nyň möhüm harby desgalary hökmünde häsiýetlendirilen pozisiýalaryna 12 sany ballistik raketa atandygy mälim edilýär.
Şeýle hem hüjümiň netijesinde bazadaky desgalar bilen birlikde şol ýerde ýerleşdirilen köp sanly amerikan harby uçarynyň ýok edilendigi öňe sürüldi.
Ynkylap Goragçylarynyň bellemegine görä, bu operasiýa ABŞ-nyň Tähranyň günbataryndaky Kerej we Nazarabad sebitleriniň golaýynda ýerleşýän dynç alyş merkezine, senagat toplumyna hem-de käbir beýleki nokatlara, şeýle-de Pişwa etrabyndaky Ynkylap Goragçylarynyň ýerli bazasyna guralan raketa hüjümlerine jogap hökmünde geçirildi.
Beýanatda “duşmanyň hüjümleri dowam etdigisaýyn”, Ynkylap Goragçylarynyň hem harby operasiýalaryny dowam etdirjekdigi nygtaldy.
Ynkylap Goragçylary şondan ozal Kuweýtdäki Ali as-Salim we Ahmed al-Jabir howa bazalarynda, şeýle hem Bahreýndäki Şeýh Isa bazasynda ýerleşýän 18 sany iri amerikan harby pozisiýasynyň urlandygyny habar beripdi.
Eýranyň goşuny tarapyndan ýaýradylan beýanatlarda Bahreýnde ýerleşýän Patriot raketa goranyş ulgamlarynyň, aragatnaşyk desgalarynyň we ABŞ-nyň Bäşinji flotuna degişli nyşanalaryň hem hüjüme sezewar edilendigi mälim edilipdi.
Soňky wakalar ABŞ-nyň Eýranyň günortasyna garşy amala aşyran hüjümlerinden we gysga wagt soň Eýranyň sebitdäki amerikan harby pozisiýalaryny nyşana almagyndan soň başdan geçirildi.
