Russiýanyň paýtagty Moskwada 350-den gowrak ukrain uçarmansyz howa ulaglary tarapyndan amala aşyrylan hüjümlerde üç adam ýogaldy.
Moskwanyň şäher häkimi Sergeý Sobýanin sosial media hasabyndan beren beýanatynda, düýn agşam sagat 20:30-dan bäri Moskwa sebitine 350-den gowrak ukrain uçarmansyz howa ulagynyň iberilendigini habar berdi. Sobýanin uçarmansyz howa ulaglarynyň aglaba böleginiň uzak aralykdan ýok edilendigini belläp, Moskwa golaýlaşan mahallary 50 uçarmansyz howa ulagynyň urlup düşürilendigini habar berdi.
Moskwa welaýatynyň häkimi Andreý Worobýew hem sosial media hasabyndan, Moskwa welaýatyna gönükdirilen hüjümlerde 81 sany uçarmansyz howa ulagynyň urlup düşürilendigini aýan etdi.
Worobýew: "Gynansak-da, ýogalan we ýaralanan adamlar bar. Istra etrabynda, Pionerskiy obasynda uçarmansyz howa ulagy ýere gaçdy we 3 adam ýogaldy we 3 adam ýaralandy. Bäş aýry jaý ýandy. Solneçnogorskda uçarmansyz howa ulagy köp gatly jaýa degmegi netijesinde 2 adam ýaralandy. Jaýyň diwarlaryna we penjirelerine zeper ýetdi" diýip belledi.
Russiýanyň Goranmak ministrliginiň beýanaty
Beýleki tarapdan Russiýanyň Goranmak ministrligi rus goşunynyň gije Ukrainanyň portlaryna hüjümlerini dowam etdirendigini aýan etdi.
Beýanatda: "Russiýanyň Ýaragly Güýçleriniň uzak aralykly howadan atylýan ýokary takyk ýaraglary we hüjümçi uçarmansyz howa ulaglaryny ulanyp amala aşyran köpçülikleýin hüjümleriniň netijesinde, Odessa sebitindäki Çornomorsk portunda harby ýükleri, ýangyjy we nebiti düşürmek we saklamak üçin ulanylýan port infrastruktura desgalaryna zarba salyndy" diýip habar berildi.
