Putin: "Biz 2029-njy ýylda, 2030-njy ýylda ýa-da 2050-nji ýylda hüjüm meýilleşdirmeýäris, ýöne hüjüm bilen ýüzbe-ýüz bolsak, jogap bermäge mejbur galarys” diýdi.

Russiýanyň Prezidenti Wladimir Putin Ýewropa hüjüm etmegi meýilleşdirmeýändigini belläp: "Eger Russiýa Kaliningrad bilen birlikde gönüden hüjüm edilse, ýurdumyzyň eýe bolan ähli ýaraglaryny ulanmak meselesi hökman we dessine gün tertibe geler" diýip nygtady.

Wladimir Putin Moskwada geçirilýän Halkara Waldaý diskussiýa klubunyň ýyllyk duşuşygynda çykyş edip, Russiýa bilen Ýewropa ýurtlarynyň arasyndaky dartgynlygyň we Ukrainadaky urşuň üstünde durup geçdi.

Putin Russiýanyň Daşary işler ministrliginiň Kaliningrad baradaky beýanatyny we käbir ýurtlara iberen hatlaryndaky sözleri goldaýandygyny aýdyp: “Eger Russiýa, şol sanda Kaliningrada gönüden-göni hüjüm edilse, ýurdumyzyň eýe bolan ähli ýaraglaryny ulanmak meselesi hökman we dessine gün tertibe geler” diýip beýan etdi.

Putin hiç bir ýurda howp salmaýandygyny nygtap: "Biz hiç kimi gorkuzmaýarys. Russiýanyň Daşary işler ministrliginiň beýanaty we käbir ýurtlara iberen hatlary gorkuzmak üçin däl, bizi gorkuzmaga synanyşyklara jogapdyr" diýdi.

Putin hiç kime hüjüm etmegi meýilleşdirmeýändigini nygtap: "Biz muny 2029, 2030 ýa-da 2050-nji ýyl üçin meýilleşdirmeýäris, ýöne bize hüjüm edilse, jogap bermeli bolarys. Ýewropa ýurtlarynyň raýatlary muny aýdyň düşünip, biziň pozisiýamyz bilen öz ýurtlaryndaky käbir syýasy liderleriň pozisiýasynyň arasyndaky tapawudy anyklamaly" diýdi.

Putin Russiýanyň beýleki tarapynda ilaty Russiýanyňkydan iki esse köp, ykdysady we harby mümkinçilikleri ägirt uly bolan tarap bardygyny we bu howpuň öňünde güýjüniň we serişdeleriniň çäklidigini, şonuň üçin özleriniň artykmaçlyklaryndan peýdalanmaly boljakdyklaryny aýtdy.

Wladimir Putin: "Häzirki wagtda Russiýada başga hiç kimiň elinde bolmadyk ýaraglar bar. Bu biziň artykmaçlygymyz" diýdi.