“Haaretz” gazetiniň habar bermegine görä, Ben-Gwir ysraýylly telekeçi Ýakow Elhararyň gyzynyň toýuna gatnaşmak we diplomatik duşuşyklar geçirmek maksady bilen ABŞ-nyň ilçihanasyna wiza almak üçin ýüz tutdy.
Habarda beýän edilmegine görä Ben-Gwir wiza amallarynyň çäginde ABŞ-nyň ilçihanasyna barmak yzyny bermek üçin çagyrylandan soň ABŞ-na saparyny bes etmek hakynda karara gelipdir.
Ysraýylyň metbugaty Ben-Gwiriň beýleki ministrler ýaly diplomatik wiza almaga hukugynyň bardygyny, emma ABŞ-nyň ilçihanasynyň “adatdan daşary” tertibi güýje girizip, aşa sagçy ministrden barmak yzyny talap edendigini beýan edýär.
Ben-Gwiriň ofisinden berilen beýanatda hem ABŞ-nyň Ysraýyldaky ilçihanasynyň wiza üçin barmak yzyny talap edendigi tassyklandy.
Saparyň maliýeleşdirilişi hem jedelleşige sebäp boldy
“Haaretz” gazetiniň maglumatyna görä, Ben-Gwiriň ABŞ-na saparynyň çykdajylarynyň ysraýylly telekeçilerden biri tarapyndan tölenjekdigi hem jedelleriň ýüze çykmagyna sebäp boldy.
Habarda Ysraýylyň Jemgyýetçilik gözegçiligi edarasynyň ýolbaşçylygynda jemlenen toparyň Ben-Gwiriň ABŞ-na saparynyň telekeçi Elharar tarapyndan maliýeleşdirilmegine garşylyk görkezendigi aýdylýar.
Görkezilen garşylykdan soň Ben-Gwir saparyň çykdajylarynyň telekeçi tarapyndan tölenmemegi baradaky ýüz tutmasyny yzyna aldy.
Ysraýylda ministrleriň hususy çeşmeler tarapyndan maliýeleşdirilen daşary ýurt saparlaryna, bähbit çaknyşygyny döretmezlik, döwlet wezipesinden ýerlikli peýdalanmazlyk we ahlak kadalaryna garşy durmazlyk şertleri bilen rugsat berilýär.
