Trampyň administrasiýasynyň Türkiýä 750 million dollarlyk F110 reaktiv uçarynyň hereketlendirijileriniň satuwyny tamamlamak üçin işe girişendigi habar berildi.
Metbugatda çykan habarlara görä, administrasiýa Kongrese Türkiýäniň ilkinji ýerli harby uçary “KAAN-y” uçurjak "General Electric" tarapyndan öndürilen hereketlendirijileriň satuwyny dowam etdirmek niýeti barada habar berdi. Administrasiýa Prezident Rejep Taýyp Erdogany "sebitde möhüm hyzmatdaş" diýip, atlandyrdy.
Bu başlangyç, ABŞ-nyň Prezidenti Donald Trampyň geljek aý Ankarada Prezident Erdogan bilen duşuşmagyna garaşylýan NATO-nyň sammitinden öň Türkiýäni kanagatkandyrjak möhüm žest hasaplanýar.
Satuwyň birnäçe günüň dowamynda tamamlanmagyna garaşylýar. ABŞ-nyň Döwlet departamenti bolsa Kongrese resmi taýdan maglumat berer.
Tramp çarşenbe güni, Ankaranyň F-35 harby uçarlary we reaktiv hereketlendirijiler baradaky haýyşy hakda soralanda, "Türkiýäni örän begendirjek" başlangyç etmeginiň mümkindigini aýdypdy.
Trampyň NATO-nyň 7-8-nji iýulda geçiriljek sammitine gatnaşmak üçin Ankara gelip, Prezident Erdogan bilen duşuşmagyna garaşylýar.
ABŞ 2019-njy ýylda Türkiýäniň Russiýadan S-400 howa goranyş ulgamyny satyn almagyna garşylyk görkezip, Türkiýäni F-35 harby uçarlary hakynda maksatnamadan çykarypdy. Waşington S-400 ulgamynyň F-35-leriň howpsuzlygyna wehim saljakdygyny we NATO-nyň ulgamlary bilen gabat gelmeýändigini öňe sürüpdi.
Türkiýe iki ulgamyň arasynda hiç hili gapma-garşylygyň ýokdugyny yzygiderli beýan edip, meseläni derňemek üçin bilelikdäki toparyň döredilmegini teklip edipdi.
Ankara şeýle hem F-35 maksatnamasynda öz borçlaryny ýerine ýetirendigini we onuň çykarylmagynyň kadalara bap gelmeýändigini beýan edipdi.
Türkiýe F-35 harby uçarlarynyň diňe öz goranyşyny däl, eýsem NATO-nyň goranyş mümkinçiliklerini hem güýçlendirjekdigini öňe sürýär.
