Ýyldyz, Birleşen Milletler Guramasynyň (BMG) Howpsuzlyk Geňeşinde "Ýakyn Gündogardaky ýagdaý" güntertibi boýunça Siriýadaky wakalary ara alyp maslahatlaşmak üçin geçirilen maslahatda çykyş etdi.
"Ençeme ýyl dowam eden rehimsiz çaknyşyklardan soň, 24-nji dekabrdan bäri Siriýanyň halkynyň görkezen edermenligi bizde geljek üçin umyt döredýär" diýen Ýyldyz, Siriýanyň başdan geçirýän kynçylyklaryna garamazdan ösüşini dowam etdirýändigini nygtady.
Ýyldyz, Halk Mejlisiniň doly işleýän kanun çykaryjy edara öwrülmegini we Mejlisiň Asadyň döwründäki terrorçylyk kazyýetini bes etmek baradaky kanun taslamasyny biragyzdan tassyklamagyny, ýurduň kadalaşma prosesinde edilen oňyn başlangyçlaryň mysallary hökmünde beýan etdi.
Muňa garamazdan Siriýada howpsuzlyk bilen baglanyşykly kynçylyklaryň dowam edýändigini bellän, Ýyldyz şeýle diýdi: "Biz Siriýanyň hökümetiniň terror guramasy DAEŞ-i düýbünden ýok etmek ugrunda halkara hyzmatdaşlar bilen işleşmek boýunça tagallalaryny we global koalisiýa bilen hyzmatdaşlyk arkaly görkezen tutanýerliligini goldaýarys." Ýyldyz sözüni şeýle dowam etdirdi: "DAEŞ öz strategiýasyny ýerlerdäki täze şertlere uýgunlaşdyrýan bolsa, Siriýada şol üýtgeýän howpa garşy durjak güýçli we hünär derejesi ýokary howpsuzlyk edaralaryň döredilmegi zerurdyr. Şonuň üçin bu edaralaryň mümkinçiliklerini ýokarlandyrmak boýunça halkara goldaw dowam etmelidir.”
"(Ysraýylyň) oýlanşyksyz hereketleri bes edilmelidir"
Ýyldyz, Ysraýylyň Siriýanyň özygtyýarlylygyny we territorial bitewiligini yzygiderli bozmagynyň ýurtda gazanylan oňyn ösüşlere zyýan ýetirýändigini nygtap: "Ýagdaý, esasanam Siriýanyň günortasynda alada döredýär. Ysraýylyň ol ýerdäki dowam edýän harby goşulmalary, giňelmä gönükdirilen hereketleri we söweş hereketleri gözegçilikden çykyp barýar" diýdi. Ilçi Yyldyz sözüni şeýle dowam etdirdi: "Bu oýlanşyksyz hereketler bes edilmelidir. Ysraýyl 1974-nji ýyldaky ylalaşyga we BMG-niň Howpsuzlyk Geňeşiniň degişli kararlaryna — esasanam 497 belgili karara — doly eýermeli we basylyp alnan Siriýanyň Golan belentliklerinden çekilmelidir."
Serhetlerini gorap saklamaga hem-de sebitde parahatçylyga we ykdysady hyzmatdaşlyga goşant goşmaga ukyply durnukly we özygtyýarly Siriýanyň, şol sanda Ysraýylyň bähbitlerine hem hyzmat etjekdigini bellän Yyldyz şeýle diýdi: "Türkiýe Siriýanyň özygtyýarlylygyna, syýasy birligine we territorial bitewiligine berk ygrarlydyr. Biz durnukly, howpsuz we gülläp ösýän Siriýa ugrunda sebitdäki we halkara hyzmatdaşlarymyz bilen bilelikde işlemegi dowam etdireris."
