TEKNOFEST-iň internet sahypasynda ýerleşdirilen maglumata görä, Türkiýäniň deňizlerdäki kuwwatyny we ýokary tehnologiýa mümkinçiliklerini ýaş nesillere tanyşdyrmagy maksat edinýän TEHNOFEST Mawy Watan 20–23-nji awgust aralygynda Kojaeli welaýatynda geçiriler. Türkiýäniň Milli Goranmak ministrligi bilen Türkiýäniň Tehnologiýa Topary gaznasynyň (T3 gaznasy) guramagynda Göljügiň gämi gurluşyk wefiniň serkerdeliginde geçiriljek festiwal deňizçilik medeniýetini geljege ýetirmegi maksat edinýär.
Uçarmansyz deňiz enjamlary we suwasty raketalar bäsleşer
Deňizçilik we suwasty tehnologiýalara gönükdirilen TEHNOFEST 2026-nyň çäginde tehnologiýa höwesjeň ýaşlaryň taýýarlan taslamalary bäsleşer. Çäräniň dowamynda Uçarmansyz suwasty ulgamlary bäsleşigi, Suwasty raketa bäsleşigi we Uçarmansyz deňiz enjamy bäsleşikleri geçiriler.
Türk deňiz güýçleriniň meşhur gämileri halka tanyşdyrylar
Festiwala gelenler Türk deňiz güýçleriniň buýsanjy bolan, olaryň düzümindäki ägirt uly platformalary ýakyndan görmäge mümkinçilik alarlar. Tanyşdyryş maksatnamasynyň çäginde “TJG Sawarona”, “TJG Anadolu”, “TJG 18 Mart” suwasty gämisi we “TJG Murat Reis” suwasty gämisi ýaly meşhur gämilere ýörite gezelençler guralar.
Mundan başga-da Türk deňiz güýçleriniň sergisi, SAT we SAS ýörite güýçleriniň komandoslarynyň, şeýle hem deňiz awiasiýasy bölümleriniň täsir galdyryjy görkezilişleri we goranyş senagatyna degişli köp sanly çäre geçiriler.
Gatnaşmak tölegsiz
Gatnaşmagyň doly tölegsizdigi beýän edilen TEHNOFEST Mawy Watana barmak isleýänleriň öňünden onlaýn görnüşde hasaba durmagy zerurdyr. Hasaba durmak isleýän raýatlaryň täze nesil sosial media platformasy bolan NSosialda hasap açmagy talap edilýär.
Festiwala gatnaşmak üçin orunlaryň çäklidigi sebäpli, 7 ýaşdan uly her bir gatnaşyjy üçin aýratyn petek taýýarlanmaly. 7 ýaşyna ýetmedik çagalar üçin bolsa hasaba durmak talap edilmeýär.
Gatnaşyjylaryň çäräniň geçirilýän ýerinesagat 09:00–18:00 aralygynda baryp biljekdikleri mälim edildi. Çärä hasaba durmak we has giňişleýin maglumat almak üçin TEHNOFEST-iň https://www.teknofest.org/tr/ sahypasyna girmek maslahat berilýär.
