Eýran duşenbe güni Liwanyň Daşary işler ministrliginiň Eýranyň ilçisini islenmeýän adam hökmünde yglan edip, ýurdy terk etmegini isländigine garamazdan ilçiniň Beýrutdaky wezipesini dowam etdirjekdigini habar berdi.
Liwanda Hizbullah bilen Ysraýylyň arasyndaky söweşiň güýçlenýän döwründe eýranly ilçiniň ýagdaýy Eýran bilen Liwanyň hökümetiniň arasynda uly dartgynlyga sebäp boldy.
Liwanyň Daşary işler ministrligi geçen hepde Eýranyň ilçisi Muhammed Ryza Şibaniden 29-njy marta çenli ýurdy terk etmeginiň islenendigini mälim edipdi.
Liwanyň Daşary işler ministrliginden berlen beýannamada Şibaniniň Liwanyň içeri syýasaty hakynda beýannama bermek bilen diplomatik kadalary basgylandygy nygtalypdy.
Güýçli şaýy musulman syýasatçy we Hizbullahyň ýarany Liwanyň Parlamentiniň başlygy Nebih Berri, Daşary işler ministrliginiň kararyna garşylyk görkezdi we Eýranyň ilçisi Şibaniniň wezipesini dowam etdirmegini isledi.
“Eýranyň ilçisi wezipesini dowam etdirer”
Eýranyň Daşary işler ministrliginiň metbugat sekretary İsmail Bagai mesele hakynda metbugata beren beýannamasynda, Şibaniň Beýrutda galjakdygyny we wezipesini dowam etdirjekdigini aýtdy.
Bagai “Liwanda degişli taraplar bilen geçirlen gepleşiklere we gelinen netijä laýyklykda Eýranyň ilçisi Beýrutdaky wezipesini dowam etdirer” diýdi.
Liwanyň Daşary işler ministrligi, ilçä berlen möhlediň dolmagyndan soň mesele hakynda hiç hili beýannama bermedi.
Liwan Ysraýyl bilen ABŞ-nyň Eýrana garşy guran hüjümleri we Eýranyň ozalky dini lideri Ali Hamaneýiň öldürilmegi sebäpli 2-nji martda Ýakyn Gündogar söweşine çekildi.
Bu waka Ysraýylyň Tährana goldaw berýän şaýy topar Hizbullaha degişli ýerlere raketa hüjümini guramagyna sebäp boldy.
Ysraýyl şol günden bäri Liwana guraýan hüjümlerini dowam etdirýär.
